خواجہ سعد رفیق کی عمران خان اور آصف علی زرداری پر شدید لفظی شیلنگ

وزیرریلوے خواجہ سعد رفیق کا کہنا ہے کہ آصف زرداری اور عمران خان کا ٹولا اقتدار کی بھوک میں باولے ہوگئے ہیں جب کہ آصف زرداری دھرتی کا بوجھ اور قوم پر بھاری ہیں۔
لاہور پریس کلب میں پریس کانفرنس کرتے ہوئے خواجہ سعد رفیق نے کہا کہ پاناما کیس پر سپریم کورٹ سے فیصلہ آ گیا ہے تو اس کا احترام کیا جائے مگر عدالت کے ریمارکس کو توڑ مروڑ کر پیش کیا جارہا ہے، زرداری اوراعتزازاحسن نے براہ راست سپریم کورٹ کوٹارگٹ کیا۔ انہوں نے کہا کہ پاناما کیس کے فیصلے سے متعلق فریقین کہتے رہے ہیں فیصلے کو مانیں گے مگر فیصلہ آنے پر بعض لوگوں کو غشی کے دورے پڑ رہے ہیں اور عدالت پر اثر انداز ہونے کی کوشش کی گئی، کیا یہ توہین عدالت نہیں ہے۔
خواجہ سعد رفیق کا کہنا تھا کہ مخالفین ہمیں ہدف تنقید بنائیں لیکن اداروں کو متنازع بنانے کی سازش بند کریں اور گندی سیاست میں پاکستانی اداروں کومت گھسیٹیں جب کہ عدالتی فیصلوں کوچیلنج کرنے کی روایت پڑگئی توکون سا ادارہ بچے گا۔ انہوں نے کہا کہ عدالتی فیصلے کے بعد عمران خان، زرداری اینڈ کمپنی اور کچھ جوکروں کودورے پڑرہے ہیں اور اعتزازاحسن کا اپنا ٹریک رکارڈ ہے کہ انہوں نے کس کا دل ٹھنڈا کرنے کی کوشش کی مگر ہمارے خلاف جن 2 ججوں نے رائے دی وہ ان کا حق تھا۔
وزیرریلوے نے پیپلزپارٹی کے شریک چیرمین کو تنقید کا نشانہ بناتے ہوئے کہا کہ آصف زرداری کی بہادری کا بھی پتا ہے، ان کو ہمارے سندھ میں آنے پر تکلیف ہے کیوں کہ سندھ میں ایک سیاسی خلا ہے جو ہمارے آنے سے پر ہوجائے گی مگر زرداری کو اور کچھ تو نہیں کرنا صرف کرپشن ہی بند کردیں تو سندھیوں کو سکون ملے گا۔ انہوں نے کہا کہ یہ زرداری قوم پربھاری اور دھرتی کے بوجھ ہیں، ان کے پیٹ نہیں بھرتے جب کہ یہ پیپلز پارٹی بے نظیر بھٹو شہید کی پارٹی نہیں یہ تو زرداری کی پارٹی بن گئی ہے، پیپلزپارٹی کی 10 سال سے سندھ میں حکمرانی ہے جہاں انہوں نے کراچی کو کچرے کا ڈھیر بنا دیا، یہ لوگ پاکستان کولوٹ کے کھا گئے اور اب سندھ کا بھی بیڑا غرق کردیا ہے

اس خبر پر اپنی رائے کا اظہار کریں

اپنا تبصرہ بھیجیں